विदर्भ न्यूज एक्सप्रेस
वृत्तसंस्था / नाशिक (Nashik) : यंदाच्या दमदार पावसामुळे नाशिक जिल्ह्यातील धरणसाठ्यात लक्षणीय वाढ झाली असून २६ प्रमुख प्रकल्पांमध्ये एकूण ८२.२२ टक्के जलसाठा नोंदवण्यात आला आहे. मागील वर्षी याच दिवशी म्हणजे ४ ऑगस्ट २०२४ रोजी हा साठा केवळ ४७.०४ टक्के इतका होता. त्यामुळे यंदाचा पावसाळा जिल्ह्यासाठी समाधानकारक ठरत असल्याचे चित्र स्पष्ट होत आहे.
गेल्यावर्षीच्या तुलनेत यंदा गंगापूर धरणातही पाणीसाठा वाढलेला दिसत असून, सध्या येथे ८१.५३ टक्के जलसाठा आहे. गतवर्षी याच तारखेला हा साठा ८०.७१ टक्के होता.
९ प्रकल्प शंभर टक्के भरले –
जिल्ह्यातील २६ प्रकल्पांपैकी कश्यपी, आळंदी, वाघाड, भावली, वालदेवी, नांदूरमध्यमेश्वर, भाम, हरणबारी आणि माणिकपुंज ही नऊ धरणे १०० टक्के भरली आहेत. या धरणांमधील भरावामुळे संबंधित भागातील पाणीपुरवठा आणि सिंचनाच्या दृष्टीने मोठा दिलासा मिळणार आहे.
अन्य प्रकल्पांचा स्थिती खालीलप्रमाणे –
दारणा – ८६.७५%
मुकणे – ९५.३०%
कडवा– ९०.५८%
वाकी – ८६.२८%
चणकापूर (गिरणा खोरे)– ६९.४३%
केळझर – ७६.७५%
नागासाक्या– ४४.३३%
गिरणा – ६५.६८%
गौतमी गोदावरी – ९९.३६%
पालखेड– ६५.५४%
करंजवण – ८१.६६%
ओझरखेड – ९१.३१%
पुणेगाव – ७८.६५%
तिसगाव – ९६.९२%
विसर्ग थांबवण्यात आला –
सध्या पावसाने काहीशी विश्रांती घेतल्याने, आधी सुरू असलेला अनेक धरणांमधील विसर्ग तात्पुरता थांबविण्यात आला आहे. मात्र, भविष्यात पावसाचे प्रमाण वाढल्यास धरणांमधून पुन्हा विसर्ग सुरू करण्याची शक्यता आहे.
शेती आणि जलव्यवस्थेसाठी सकारात्मक चित्र –
जिल्ह्यातील एकूण जलसाठा समाधानकारक पातळीवर पोहोचल्यामुळे कृषी, पिण्याच्या पाण्याचा पुरवठा आणि औद्योगिक वापराच्या दृष्टीने जिल्ह्याला मोठा आधार मिळणार आहे. पाटबंधारे विभाग आणि जिल्हा प्रशासन परिस्थितीवर सतत लक्ष ठेवून आहे.
