विदर्भ न्यूज एक्सप्रेस
वृत्तसंस्था / लातूर(Latur) : क्षुल्लक कारणावरून झालेल्या वादातून एका शिक्षकाचा चाकूने खून झाल्याची धक्कादायक घटना लातूर शहरातील मारवाडी स्मशानभूमी परिसरात शुक्रवारी (१०) दुपारी साडेतीनच्या सुमारास घडली. या घटनेने परिसरात एकच खळबळ उडाली असून, पोलिसांनी तत्काळ कारवाई करत संशयित आरोपीस ताब्यात घेतले आहे. याप्रकरणी विवेकानंद चौक पोलिस ठाण्यात गुन्हा दाखल करण्याची प्रक्रिया सुरू आहे.
पोलिसांनी दिलेल्या माहितीनुसार, रामेश्वर बाबुराव बिरादार (३२, रा. सावरगाव, ता. देवणी) हे लातूर येथील मारवाडी स्मशानभूमी परिसरात आले असता, त्यांच्यात एका तरुणासोबत काही कारणावरून बाचाबाची झाली. वाद वाढताच आरोपीने खिशातील चाकू काढून रामेश्वर बिरादार यांच्यावर सपासप वार केले. यात ते गंभीर जखमी होऊन घटनास्थळीच कोसळले.
स्थानिक नागरिक आणि गॅरेजवरील कामगारांनी तातडीने धाव घेऊन जखमी शिक्षकाला ऑटोरिक्षातून शासकीय सर्वोपचार रुग्णालयात दाखल केले; मात्र डॉक्टरांनी त्यांना मृत घोषित केले.
घटनेची माहिती मिळताच अप्पर पोलिस अधीक्षक मंगेश चव्हाण, शहर उपविभागीय अधिकारी समीर साळवे, स्थानिक गुन्हे शाखेचे निरीक्षक सुधाकर बावकर तसेच विवेकानंद चौक पोलिस ठाण्याचे निरीक्षक संतोष पाटील** यांनी घटनास्थळी भेट देऊन पाहणी केली. पोलिसांनी संशयित आरोपीस ताब्यात घेऊन त्याच्याकडून चौकशी सुरू केली आहे.
कामासाठी आला आणि घात झाला –
मृत रामेश्वर बिरादार हे देवणी तालुक्यातील पंढरपूर-गुरधाळ येथील शैक्षणिक संस्थेत कंत्राटी शिक्षक** म्हणून कार्यरत होते. शुक्रवारी ते काही कामानिमित्त लातूरला आले असताना मारवाडी स्मशानभूमी परिसरात आरोपीशी त्यांचा वाद झाला. या वादातूनच त्यांच्यावर चाकूने हल्ला झाला. कामासाठी आलेल्या या शिक्षकाचा लातूरमध्ये घात झाला, हे ऐकून सहकाऱ्यांमध्ये आणि परिसरात हळहळ व्यक्त केली जात आहे.
मोबाइल-पैशांसाठी वादाचा अंदाज –
संशयित आरोपी हा मेघराज नगरात राहणारा २२ वर्षीय तरुण असून, त्याने शिक्षकाला मोबाइल किंवा पैशांसाठी धमकावले असावे, असा पोलिसांचा प्राथमिक अंदाज आहे. वाद चिघळल्याने आरोपीने चाकूने सपासप वार केले.
