– जास्त भाडेदराची आकारणी केल्यास तक्रार नोंदविण्याचे आवाहन
विदर्भ न्यूज एक्सप्रेस
प्रतिनिधी / चंद्रपूर (Chandrapur) : गृह विभागाच्या शासन निर्णयान्वये, खाजगी प्रवासी बस (स्लीपर/सिटिंग) यांचे महत्तम भाडेदर निश्चित करण्यात आले आहे. दिवाळीत गर्दीच्या हंगामात चंद्रपूर येथून पुणे व औरंगाबाद जाणाऱ्या किंवा चंद्रपूर येथे येणाऱ्या बसेसचा कमाल दर निश्चित करण्यात आला आहे. सदर बसेसचा दर महाराष्ट्र राज्य परिवहन महामंडळाच्या भाड्याच्या दीडपट पेक्षा जास्त असता कामा नये.
असे असेल चंद्रपूर ते औरंगाबाद व चंद्रपूर ते पुणे मार्गावरील बसेसचे भाडे :
चंद्रपूर ते औरंगाबाद या प्रवास मार्गाकरीता शयनयान स्लीपर(एसी) बसचे भाडे २ हजार २५० रुपये तर (एसी) सिटिंग बसचे भाडे १ हजार ५६० रुपये निर्धारित करण्यात आले आहे. तसेच चंद्रपूर ते पुणे या प्रवास मार्गाकरीता शयनयान स्लीपर बसचे भाडे ३ हजार ३०० रुपये तर (एसी) सिटिंग बसचे भाडे २ हजार ३१५ रुपये निर्धारित करण्यात आले आहे.
शासनाने ठरवून दिलेल्या दरापेक्षा जास्त किंवा एस.टी. महामंडळाच्या बसच्या भाडेदराच्या दीड पटापेक्षा जास्त भाडेदराची आकारणी केल्यास प्रवाशांनी उपप्रादेशिक परिवहन कार्यालय, चंद्रपूर यांच्याकडे ७१७२२७२५५५ या व्हाट्सअप क्रमांकावर किंवा dyrto.34-mh@gov.in या ई-मेल आयडीवर वाहनाचे नोंदणी क्रमांक व भाडे आकारणी तिकिटाच्या फोटोसह तक्रार नोंदवावी, असे उपप्रादेशिक परिवहन अधिकारी किरण मोरे यांनी कळविले आहे.
