– शासनाने जाहिर केले होते एकुण २८ लाख रूपयांचे बक्षिस.
– एक डीव्हीसीएम (Divisional committee member) दर्जाच्या वरीष्ठ कॅडरसह, एक एसीएम (Area Committee Member) व दोन सदस्य पदावरील माओवाद्यांनी केले आत्मसमर्पण
– दोन पती-पत्नी जोडप्यांनी आत्मसमर्पण करुन स्वीकारला सन्मानाने जीवन जगण्याचा मार्ग
विदर्भ न्यूज एक्सप्रेस
प्रतिनिधी / गडचिरोली : शासनाने सन २००५ पासून जाहिर केलेल्या आत्मसमर्पण योजनेमुळे तसेच हिंसाचाराच्या जीवनाला कंटाळून वरिष्ठ माओवाद्यांसह अनेक जहाल माओवाद्यांनी आजपर्यंत पोलीसांसमोर आत्मसमर्पण केलेले आहे. त्याचबरोबर आत्मसमर्पित माओवाद्यांचे पोलीस दलाने पुनर्वसन घडवून आणल्यामुळे आजपर्यंत एकुण ६९५ माओवाद्यांनी गडचिरोली पोलीस दलासमोर आत्मसमर्पण केले आहे. आज ०३ फेब्रुवारी २०२५ रोजी ०१ डी.व्हि.सी.एम., ०१ ए.सी.एम. दर्जाच्या वरिष्ठ माओवाद्यांसह ०२ सदस्य अशा एकुण ०४ जहाल माओवादी १) अशोक पोच्या सडमेक ऊर्फ बालन्ना ऊर्फ चंद्रशेखर, डी.व्हि.सी.एम टेक्नीकल टीम (६३), रा. अर्कापल्ली, ता. अहेरी, जि. गडचिरोली, २) वनिता दोहे झोरे, एसीएम टेक्नीकल टीम (५४), रा. कोरनार, ता. एटापल्ली. जि. गडचिरोली, ३) साधू लिंगु मोहंदा ऊर्फ शैलेश ऊर्फ समीर, प्लाटून-३२ सदस्य (३०) रा. तुमरकोडी, ता. भामरागड जि. गडचिरोली व ४) मुन्नी पोदीया कोरसा, पार्टी सदस्य (२५), रा. सिलीगेंर ता. कोळा, जि. सुकमा (छ.ग.) यांनी गडचिरोली पोलीस व सिआरपीएफ समोर आत्मसमर्पण केले.
आत्मसमर्पित जहाल माओवादी सदस्यांबाबत माहिती –
१) अशोक पोच्या सडमेक ऊर्फ बालन्ना ऊर्फ चंद्रशेखर
दलममधील कार्यकाळ –
– सन १९९१ मध्ये अहेरी दलम मध्ये भरती होवून १९९५ पर्यंत कार्यरत
– सन १९९५ ते १९९७ पर्यंत बालाघाट परिसरात ताडा दलम (म.प्र.) मध्ये एसीएम पदावर पदोन्नती होवून कार्यरत.
– सन १९९८ ते १९९९ अहेरी दलममध्ये एसीएम पदावर कार्यरत होता.
– सन २००० मध्ये चामोर्शी दलममध्ये कंमाडर पदी पदोन्नती होवून सन २००३ पर्यंत काम केले.
– सन २००३ साली डिव्हिसीएम पदावर पदोन्नती होवून चामोर्शी दलममध्ये सन २००५ पर्यंत कार्यरत.
– सन २००५ ते २००७ पर्यंत अहेरी दलम कंमाडर म्हणून काम केले.
– सन २००७ ते २०१७ पर्यंत नक्षल साहित्य शिक्षण सामितीमध्ये कार्यरत राहुन नियुक्ती दलमसोबत नक्षल संघटनेबाबात शिक्षण देण्याचे काम केले.
– सन २०१८ मध्ये टेक्नीकल टिममध्ये बदली होवून आजपर्यंत कार्यरत.
कार्यकाळात केलेले गुन्हे –
अशोक पोच्या सडमेक ऊर्फ बालन्ना ऊर्फ चंद्रशेखर याच्यावर आजपर्यंत एकुण ८२ गुन्हे दाखल असून त्यामध्ये ३१ चकमक, १७ जाळपोळ, व ३४- इतर गुन्ह्रांचा समावेश आहे.
२) वनिता दोहे झोरे
दलममधील कार्यकाळ –
– सन १९९३ मध्ये एटापल्ली दलममध्ये भरती होवून सन १९९५ पर्यंत कार्यरत.
– सन १९९५ मध्ये टिपागड दलममध्ये बदली होवून सदस्य पदावर सन १९९९ पर्यंत कार्यरत.
– सन १९९९ मध्ये नॅशनल पार्क महिला दलम मध्ये कंमाडर पदावरा पदोन्नती होवून कार्यरत.
– सन २००५-२००६ मध्ये टेक्कामेट्टा जवळपासच्या गावात जनताना सरकार स्कुलमध्ये शिक्षक म्हणून काम केले.
– सन २००६ ते २०१० पर्यंत अबुझमाड मधील जटवाही, कुतुल, नेलनार या गावात ०४ वर्ष जनताना स्कुलमध्ये शिक्षक म्हणून काम केले.
– सन २०१० मध्ये एसीएम पदावर पदोन्नती होवून कार्यरत होती.
– सन २०१० ते २०१९ मध्ये गावागावात जाऊन मिटींग घेवुन जनताना सरकारसाठी काम केले.
– सन २०१९ ते २०२२ पर्यंत उसेवाडा एरीयामध्ये काम केले.
– सन २०२२ मध्ये टेक्नीकल टीममध्ये बदली होवून आजपावेतो कार्यरत होती.
कार्यकाळात केलेले गुन्हे –
वनिता दोहे झोरे हिच्यावर आजपर्यंत एकुण ११ गुन्हे दाखल असून त्यामध्ये ०१- चकमक, ०२- जाळपोळ, व ०८- इतर गुन्ह्रांचा समावेश आहे.
३) साधू लिंगु मोहंदा ऊर्फ शैलेश ऊर्फ समीर
दलममधील कार्यकाळ –
– सन २०११ मध्ये जनमिलिशिया म्हणून भरती होवून भामरागड दलमसोबत सन २०१२ पर्यत काम केले.
– सन २०१२ मध्ये सदस्य पदावर बढती होवून भास्कर हिचामी याचा अंगरक्षक म्हणून सन २०१७ पर्यंत काम केले.
– सन २०१७ मध्ये कसनसूर दलममध्ये बदली होवून कार्यरत.
– सन २०१८ मध्ये कसनासुर-बोरीया चकमकीमध्ये जखमी झाल्यानंतर एप्रिल २०१८ मध्ये स्टाफ टिममध्ये बदली होवून सन २०२१ पर्यंत काम केले
– माहे जुलै २०२१ मध्ये प्लाटून ३२ मध्ये बदली होवून आजपर्यत सदस्य पदावर कार्यरत होता.
कार्यकाळात केलेले गुन्हे –
साधू लिंगु मोहंदा ऊर्फ शैलेश ऊर्फ समीर याच्यावर आजपर्यंत एकुण ०४ गुन्हे दाखल असून त्यामध्ये ०२- चकमक व ०२- इतर गुन्ह्रांचा समावेश आहे.
४) मुन्नी पोदीया कोरसा
दलममधील कार्यकाळ –
– सन २०१५ मध्ये बासागुडा दलममध्ये भरती होवून कार्यरत
– सन २०१६ मध्ये प्लाटून क्र. ०७ सदस्य पदावर बदली होवून सन २०१८ पर्यंत कार्यरत होती.
– सन २०१८ मध्ये प्लाटुन क्र. ३२ मध्ये प्लाटून मेंबर म्हणून बदली.
– सन २०१९ मध्ये सप्लाय टिममध्ये बदली होवून सन २०२१ पर्यंत कार्यरत होती.
– सन २०२१ मध्ये माड डिव्हिजन मध्ये बदली होवून जनताना सरकार स्कुलमध्ये शिक्षक म्हणून आजपर्यंत काम केले.
कार्यकाळात केलेले गुन्हे –
हिंसक घटनांमध्ये तिचा सहभाग असल्याची पडताळणी करणे सुरु आहे.
आत्मसमर्पीत होण्याची कारणे –
– गडचिरोली पोलीसांच्या सततच्या गस्तीमुळे जंगलात फिरणे कठिण झाले होते.
– नक्षल दलममध्ये अहोरात्र भटकंतीचे जीवन असल्यामुळे स्वत:च्या आरोग्याविषयी समस्या उद्भवल्यास त्याकडे काळजीपुर्वक लक्ष दिल्या जात नाही.
– चकमकीदरम्यान पुरुष माओवादी पळून जाण्यात यशस्वी होतात, मात्र महिला यात ठार मारल्या जातात.
– खबरी असल्याच्या फक्त संशयावरून आमच्याच बांधवांना ठार मारायला सांगतात.
– माओवादी दलममधील जेष्ठ माओवाद्यांकडुन स्त्रीयांना भेदभावजनक वागणूक दिली जाते.
– दलममधील वरिष्ठ कॅडरचे माओवादी सांगतात की, चळवळीकरीता/जनतेकरीता पैसे गोळा करावे. प्रत्यक्षात गोळा केलेला पैसा ते स्वत:साठीच वापरतात. जनतेच्या विकासासाठी हा पैसा कधीच वापरल्या जात नाही.
– वरिष्ठ माओवादी नेते फक्त स्वत:च्या फायद्यासाठी गरीब आदिवासी युवक-युवतींचा वापर करून घेतात.
शासनाने जाहिर केलेले बक्षीस –
– महाराष्ट्र शासनाने अशोक पोच्या सडमेक ऊर्फ बालन्ना ऊर्फ चंद्रशेखर याच्यावर १६ लाख रूपयाचे बक्षीस जाहिर केले होते.
– महाराष्ट्र शासनाने वनिता दोहे झोरे हिच्यावर ०६ लाख रूपयाचे बक्षीस जाहिर केले होते.
– महाराष्ट्र शासनाने साधू लिंगु मोहंदा ऊर्फ शैलेश ऊर्फ समीर याच्यावर ०४ लाख रूपयाचे बक्षीस जाहिर केले होते
– महाराष्ट्र शासनाने मुन्नी पोदीया कोरसा हिच्यावर ०२ लाख रूपयाचे बक्षीस जाहिर केले होते.
आत्मसमर्पणानंतर शासनाकडून मिळणारे बक्षीस –
– आत्मसमर्पणानंतर पुनर्वसनाकरीता केंद्र व राज्य शासनाकडुन शामला अशोक पोच्या सडमेक ऊर्फ बालन्ना ऊर्फ चंद्रशेखर याला एकुण ८.५ लाख रुपये बक्षीस जाहिर केले आहे.
– आत्मसमर्पणानंतर पुनर्वसनाकरीता केंद्र व राज्य शासनाकडुन वनिता दोहे झोरे हिला एकुण ०५ लाख रुपये बक्षीस जाहिर केले आहे.
– आत्मसमर्पणानंतर पुनर्वसनाकरीता केंद्र व राज्य शासनाकडुन साधू लिंगु मोहंदा ऊर्फ शैलेश ऊर्फ समीर याला एकुण ०५ लाख रुपये बक्षीस जाहिर केले आहे.
– आत्मसमर्पणानंतर पुनर्वसनाकरीता केंद्र व राज्य शासनाकडुन काजल मुन्नी पोदीया कोरसा हिला एकुण ४.५ लाख रुपये बक्षीस जाहिर केले आहे.
– आत्मसमर्पणानंतर पुनर्वसनाकरीता राज्य शासनाकडून पती-पत्नी असलेले नक्षल सदस्य यांनी आत्मसमर्पण केल्यास एकत्रित अतिरिक्त मदत म्हणून १.५ लाख रुपये बक्षीस जाहिर केले आहे.
– अशोक पोच्या सडमेक ऊर्फ बालन्ना ऊर्फ चंद्रशेखर व त्याची पत्नी वनिता दोहे झोरे यांना एकुण १५ लाख रुपये तसेच साधू लिंगु मोहंदा ऊर्फ शैलेश ऊर्फ समीर व त्याची पत्नी मुन्नी पोदीया कोरसा यांना एकुण ११ लाख रुपये पुनर्वसनाकरीता बक्षीस म्हणून मिळणार आहे.
– आत्मसमर्पणानंतर पुनर्वसनाकरीता केंद्र व राज्य शासनाकडुन गटाने आत्मसमर्पण केल्यास एकत्रित मदत म्हणून एकुण ०४ लाख रुपये बक्षीस जाहिर केले आहे.
गडचिरोली पोलीस दलाने अतिशय प्रभावीपणे माओवादविरोधी अभियान राबविल्यामुळे तसेच शासनाने माओवाद्यांना आत्मसमर्पणाची सुवर्णसंधी उपलब्ध करून दिल्याने, सन्मानाने जीवन जगण्यासाठी सन २०२२ ते आतापर्यंत एकुण ५० जहाल माओवाद्यांनी आत्मसमर्पण केले आहे. तसेच सन २०२५ साली आतापर्यंत एकुण १७ माओवाद्यांनी आत्मसमर्पण केले.
सदर माओवाद्यांचे आत्मसमर्पण घडवून मुख्यप्रवाहात आणण्याबाबतची कारवाई संदिप पाटील, पोलीस महानिरीक्षक (नक्षलविरोधी अभियान) नागपूर, अंकित गोयल, पोलीस उप-महानिरीक्षक, गडचिरोली परिक्षेत्र, अजय कुमार शर्मा, पोलीस उप-महानिरीक्षक (अभियान) सीआरपीएफ, नीलोत्पल, पोलीस अधीक्षक गडचिरोली व शंभु कुमार, कमांण्डट ०९ बटा. सिआरपीएफ यांच्या मार्गदर्शनाखाली पार पाडली.
यावेळी पोलीस अधीक्षक गडचिरोली नीलोत्पल यांनी आवाहन केले की, विकासकामांना आडकाठी निर्माण करणाया माओवाद्यांवर पोलीस दल सक्षमपणे कारवाई करण्यास तत्पर असुन, जे माओवादी विकासाच्या प्रवाहात सामील होण्यास ईच्छुक असतील त्यांना विकासाच्या मुख्य प्रवाहात आणण्यासाठी तसेच लोकशाहीतील सन्मानाचे जीवन जगण्यासाठी गडचिरोली पोलीस दल सर्वतोपरी मदत करेल, तसेच त्यांनी हिंसेचा त्याग करुन शांततेचा मार्ग स्विकारावा.
