विदर्भ न्युज एक्सप्रेस
वृत्तसंस्था / पिंपरी (Pimpri) : पिंपळे निलख येथे बुधवारी रात्री १० वाजता मैत्रिणीला भेटण्यासाठी आलेल्या एका तरुणावर अल्पवयीन मुलाने आणि त्याच्या वडिलांनी धारदार शस्त्राने हल्ला केला. या हल्ल्यात ज्ञानेश्वर त्रंबक चोरघडे (३१, रा. बाणेर बालेवाडी फाटा, पुणे) गंभीरपणे जखमी झाले आहेत.
पोलिसांनी दिलेल्या माहितीनुसार, ज्ञानेश्वर रात्री त्यांच्या मैत्रिणीला भेटायला पिंपळे निलख येथे आले असता, त्या परिसरातील एक अल्पवयीन मुलगा त्याचे मित्र घेऊन ज्ञानेश्वर यांना मारहाण करण्यासाठी बाणेर येथून पिंपळे निलख येथे गेला. या वादाची कारणे अद्याप स्पष्ट होऊ शकलेली नाहीत. हल्ल्यात आरोपींनी लाथाबुक्क्यांच्या मारहाणीपासून ते धारदार शस्त्राने डोक्यात, पाठीवर आणि हातावर वार केले.
सदर प्रकरणी ज्ञानेश्वर यांनी सांगवी पोलिस ठाण्यात फिर्याद दिली आहे. पोलिसांनी बलभीम शिंदे (५२, रा. पिंपळे निलख), एक अल्पवयीन मुलगा आणि एका अनोळखी तरुणाच्या विरोधात गुन्हा दाखल केला आहे. पोलिसांनी हल्लेखोरांची शोध घेण्याचे काम सुरू केले आहे.
यामुळे पिंपळे निलख परिसरात एकच खळबळ उडाली आहे आणि पोलिसांनी संबंधित आरोपींविरोधात कडक कारवाई करण्याचे आश्वासन दिले आहे.
