विदर्भ न्यूज एक्सप्रेस
वृत्तसंस्था / मुंबई : राज्यातील शेतकऱ्यांसाठी आनंदाची बातमी आहे. राज्यात आज सर्वत्र मुसळधार पावसाची शक्यता आहे. त्यामुळे आयएमडी ने ५ जिल्ह्यांना अतिमुसळधार पावसाचा अलर्ट जारी केला आहे.
या ५ जिल्ह्यांमध्ये मुसळधार पावसाची शक्यता –
आज राज्यातील पुणे, कोल्हापूर, सातारा, सिंधुदूर्ग आणि रत्नागिरी या जिल्ह्यांमध्ये अतिमुसळधार पावसाची शक्यता आहे. त्यामुळे या सर्व जिल्ह्यांमध्ये हवामान विभागाकडून या भागाला ऑरेंज अलर्ट जारी करण्यात आला आहे. तसेच आज घाटमाथ्यावरही अतिमुसळधार पावसाची शक्यता IMD कडून वर्तवण्यात आली आहे. त्यामुळे या भागातील नागरिकांनी योग्य ती खबरदारी घेण्याचे आवाहन प्रशासनाकडून करण्यात आले आहे.
मुंबईसह उपनगरात पावसाचा जोर वाढणार –
राजधानी मुंबईत गेल्या काही दिवसांपासून मुसळधार पाऊस पडत आहे. आता मुंबईसह आसपासच्या जिल्ह्यांमध्ये पावसाचा जोर वाढण्याची शक्यता हवामान विभागाने वर्तवली आहे. त्यामुळे मुंबई आणि उपनगरासह ठाणे, पालघर, रायगड या जिल्ह्यांमध्ये पावसाचा यलो अलर्ट जारी करण्यात आला आहे.
पुण्यात कसे असेल हवामान ?
पुणे शहरात आज ढगाळ वातावरण राहण्याची शक्यता आहे. तसेच सायंकाळच्या वेळी पावसाची शक्यता आहे. तसेच आज पश्चिम महाराष्ट्रातील काही जिल्ह्यांना पावसाचा यलो अलर्ट जारी करण्यात आला आहे. तसेच आज नाशिक, धुळे, अहमदनगर, नंदुरबार, जळगाव या जिल्ह्यांमध्येही पावसाची शक्यता आहे. त्यामुळे शेतकऱ्यांनी आणि नागरिकांनी योग्य ती काळजी घेण्याचे आवाहन करण्यात आले आहे.
मराठवाड्यासह विदर्भातही पावसाची शक्यता –
आज मराठवाड्यातील आणि विदर्भातील काही जिल्ह्यांमध्ये मुसळधार पावसाची शक्यता आहे. आज हवामान विभागाने छत्रपती संभाजीनगर, अमरावती, अकोला, बुलढाणा, चंद्रपूर, जालना, बीड, परभणी, लातूर, हिंगोली, धाराशिव या जिल्ह्यांमध्ये पावसाची शक्यता वर्तवली आहे. उर्वरित महाराष्ट्रात तुरळक ठिकाणी आज पावसाची शक्यता आहे. या पावसामुळे शेतकरी वर्गात आनंदाचे वातावरण असल्याचं चित्र आहे.
