विदर्भ न्यूज एक्सप्रेस
वृत्तसंस्था / मुंबई (Nagpur) : मे महिना संपत आला आहे. तीन दिवसांनी जूनला सुरुवात होणार आहे. त्यामुळे १ जूनपासून अनेक नियम बदलणार आहेत. ज्याचा थेट परिणाम तुमच्या खिशावर होऊ शकतो. यामध्ये घरगुती गॅस सिलिंडरसह इंधन आणि इतर गोष्टींचा समावेश आहे.
गॅस सिलिंडरच्या किमतीत होऊ शकतो बदल –
प्रत्येक महिन्याच्या पहिल्या दिवशी LPG सिलिंडरच्या किमतीl बदल होत असतो. त्यामुळे १ जून २०२४ रोजी सकाळी ६ वाजल्यापासून नवीन किमती लागू होण्याची शक्यता आहे. गेल्या काही महिन्यांमध्ये १९ किलोच्या व्यावसायिक गॅस सिलिंडरच्या किमतीत बदल झाला होता, आता १४ किलोच्या घरगुती गॅस सिलिंडरच्या किमतीतही बदल होण्याची शक्यता आहे. मात्र सिलिंडरच्या किंमती कमी होतील की वाढतील याबाबत माहिती समोर आलेली नाही.
पेट्रोलसह CNG-PNG च्या दरात बदल होण्याची शक्यता –
१ जूनपासून पेट्रोल डिझेलसह हवाई इंधन म्हणजेच एअर टर्बाइन इंधन (ATF) आणि CNG-PNG च्या किमतीतही बदल होऊ शकतो. इंधनाच्या नव्या किंमती सर्वसामान्यांच्या खिशावर थेट परिणाम करु शकतात. यापूर्वी एप्रिल महिन्यात ATF च्या किमती कमी करण्यात आल्या होत्या. आता इतर इंधनावर काय परिणाम होतो ते पाहणे महत्वाचे ठरणार आहे.
SBI क्रेडिट कार्डचे नियम बदलणार –
SBI क्रेडिट कार्डचे नियम १ जून २०२४ पासून बदलणार आहेत. जून २०२४ पासून काही क्रेडिट कार्डांवर सरकारी कामां संबंधित व्यवहार केल्यावर रिवॉर्ड पॉइंट लागू मिळणार नाहीत. यामध्ये स्टेट बँकेचे AURUM, SBI Card ELITE, SBI Card ELITE Advantage आणि SBI Card Pulse, SimplyCLICK SBI कार्ड, SimplyClick Advantage SBI कार्ड आणि SBI Card PRIME यांचा समावेश आहे.
ड्रायव्हिंग लायसन्सचा नियम बदलणार –
१ जूनपासून ड्रायव्हिंग लायसन्सशी संबंधित नियमही बदलणार आहे. १ जूनपासून खाजगी संस्थांना (ड्रायव्हिंग स्कूल) ड्रायव्हिंग चाचण्या घेता येणार आहेत. आतापर्यंत या चाचण्या फक्त RTO द्वारे सरकारी केंद्रांमध्ये घेतल्या जात होत्या. आता ड्रायव्हिंग स्कूलमध्येही लायसन्ससाठी अर्ज करणाऱ्यांची ड्रायव्हिंग टेस्ट घेतली जाईल आणि त्यांना लायसन्स दिले जाईल. मात्र या चाचण्या फक्त RTO ची मान्यता असलेल्या ड्रायव्हिंग स्कूलमध्येच घेता येणार आहे. तसेच १८ वर्षांखालील अल्पवयीन व्यक्ती वाहन चालवताना आढळून आल्यास त्याला २५ हजार रुपयांच्या दंडासह वयाच्या २५ वर्षांपर्यंत लायसन्स दिले जाणार नाही.
आधारकार्ड फ्री अपडेट करता येणार नाही –
हा बदल १४ जूनपासून लागू होणार आहे. UIDAI ने आधार कार्ड मोफत अपडेट करण्याची मुदत १४ जूनपर्यंत वाढवली होती, याआधीही ती अनेक वेळा वाढवण्यात आली होती, त्यामुळे आता ती आणखी वाढवण्याची शक्यता कमी आहे. त्यामुळे १४ जूननंतर तुम्हाला आधार कार्ड मोफत अपडेट करता येणार नाही. यासाठी ५० रुपये शुल्क द्यावे लागेल.
